Прадстаўніцтва па нацыянальным адраджэнні абвяшчае пра заснаванне «Дня герояў і гераіняў», які будзе адзначацца 2 лютага ў гонар нараджэння Кастуся Каліноўскага, знакавай постаці беларускай барацьбы за незалежнасць.
Гэты дзень прысвечаны гераізму не толькі Кастуся Каліноўскага, але і многіх іншых выдатных асобаў, якія сталі сімваламі барацьбы беларусаў. Мы ўшаноўваем дзеячаў культуры, навукі, рэвалюцыянераў, рэфарматараў, ваяроў і палітычных зняволеных – усіх, хто абраў сваёй місіяй барацьбу за Беларусь.
«Дзень герояў і гераіняў» – гэта магчымасць аб'яднаць народ у павазе і ўдзячнасці да тых, хто зрабіў нязгасны ўнёсак у гісторыю і сучаснасць Беларусі. Гэты дзень будзе сімвалізаваць нацыянальную годнасць і няспынную барацьбу і натхняць нас на новыя здзяйсненні.
Запрашаем усіх беларусак і беларусаў далучыцца да гэтай ініцыятывы, падзяліцца сваімі гісторыямі пра сучасных герояў і гераіняў, і прапанаваць імёны для ўключэння ў «Кола беларускіх герояў і гераіняў». Зрабіць гэта можна на нашай старонцы ў Instagram. Ваш унёсак і меркаванні вельмі важныя для нас.
Дзень герояў і гераіняў зʼяўляецца адлюстраваннем сапраўднага духа і салідарнасці беларускага народу.
Жыве Беларусь! Гонар няскораным героям і гераіням!
Галоўная
