Прадстаўніцтва паслядоўна адстойвае беларускую культуру як складнік нацыянальнай бяспекі. Менавіта культура як сукупнасць матэрыяльных і духоўных каштоўнасцяў захоўвае і перадае наступным пакаленням нашую ідэнтычнасць, спосаб мыслення і гістарычны досвед – яны па-над дзяржаўнымі інстытутамі і нават дзяржаўнымі межамі.
Мы ўпэўненыя, што ад культуры і яе мадэрновасці, інавацыйнасці, прасунутасці шмат у чым залежыць хуткасць і эфектыўнасць пераходу дзяржавы да дэмакратычных практык, калі грамадска-палітычны крызіс міне.
Таксама культура – ключавы элемент для наладжвання міжнацыянальных стасункаў і выбудоўвання партнёрства ў міжнародным кантэксце. У некаторых выпадках, дзе палітычны кантэкст успрымаецца неадназначным ці чуллівым, менавіта міжкультурніцкі абмен і супраца – галоўны спосаб камунікацыі паміж нацыямі.
Да таго ж у палітычнай сітуацыі, якая паказвае адну і тую ж дынаміку на працягу гадоў, культурніцкі кірунак становіцца яшчэ больш перспектыўным і шматабяцальным. Момант гісторыі, у якім цяпер перабываюць беларусы, падказвае: трэба факусавацца на сваёй ідэнтычнасці і разбудоўванні мастацтва і культуры як сукупнасці каштоўнасцяў, практыкі ўзаемаадносінаў і спосабу жыцця. Мы можам не мець за сабою краіны, якая адлюстроўвае нашыя памкненні, але менавіта ў культуры мы захаваем сябе як нацыю. Адпаведна сфера культуры дазваляе ствараць стратэгічны падыход, які будзе не рэакцыяй на дзеянні рэжымаў Беларусі і Расеі, а, наадварот праактыўнаю пазіцыяй.
Як ні парадаксальна, грамадска-палітычны крызіс у Беларусі робіць беларускую культуру яшчэ больш значнай і каштоўнай у міжнародным кантэксце: досвед існавання паміж Усходам і Захадам, супраціву аўтарытарызму і змагання з каланіяльным уплывам разам з аўтэнтычнасцю ды сучаснымі мастацкімі формамі прыносяць свету каштоўныя перспектыву і голас.
Беларусы маюць усведамляць сваю вартасць і важнасць свайго досведу ў прыватнасці для Еўропы ў часе істотных выклікаў для свабоды, роўнасці і права. Задача Прадстаўніцтва па нацыянальным адраджэнні – каб гэта разумелі і замежныя партнёры: беларусы не толькі намагаюцца захаваць уласную ідэнтычнасць – беларуская культура ёсць каштоўным унёскам у сусветную настолькі, наколькі тая палягае на міжкультурніцкім абмене і адкрытая да новых практык і перспектываў.
