Моўная
палітыка

Прадстаўніцтва разглядае пытанне захавання і развіцця беларускай мовы як той, што трапіла ў міжнародны атлас моваў, якім пагражае знішчэнне, выдадзены UNESCO, сваім стратэгічным прыярытэтам.

З улікам шматгадовых працэсаў русіфікацыі ўсіх сфераў грамадскага жыцця ў Беларусі – сістэмы адукацыі, сферы паслуг, дзяржаўных і грамадскіх сэрвісаў, культуры, – чаму таксама спрыяла прынятая неналежным юрыдычным чынам практыка дзяржаўнага двухмоўя, беларуская мова і яе выкарыстанне беларускім грамадствам робіцца прадметам асобнага клопату, якому неабходнае падтрыманне з боку Прадстаўніцтва.

Стратэгічныя прыярытэты

Падтрымка арганізацый

Комплекснае спрыянне грамадскім арганізацыям і ініцыятывам, якія вывучаюць, развіваюць, прамуюць беларускую мову як сярод беларускага грамадства і навучаюць ёй, гэтак і сярод прадстаўнікоў іншых народаў (падтрыманне дзейнасці, лабіяванне інтарэсаў, адвакацыя на міжнародным узроўні, дапамога з развязаннем канкрэтных пытанняў).

Дасягненне моўнага раўнапраўя ў грамадскім жыцці

Папулярызацыя і вяртанне беларускай мовы ў шырокі ўжытак на падрыхтоўчым этапе, дасягненне ў транзітны перыяд рэальнага раўнапраўя беларускай і расійскай моваў у грамадскім жыцці ды ажыццяўленне комплекснага пераходу да беларускай мовы як агульнанацыянальнай на наступных этапах пры захаванні права навучацца і карыстацца роднаю моваю для нацыянальных меншасцяў.

Праца з сусветнымі сервісамі

Лабіяванне беларускай мовы як адной з моваў краінаў Еўразвязу і глабальна дасяжнай у якасці мовы выбару на папулярных сусветных сэрвісах і пляцоўках (Google, Amazon, Spotify і г. д.).

Перайманне досведу іншых краін

Вывучэнне і пераняцце досведу падтрымання ды развіцця нацыянальных моваў у іншых краінах свету, якія таксама сутыкаліся з каланіяльным падыходам да ўласнай гісторыі і культуры, правядзенне адмысловых захадаў і экспертных нарадаў.

Пашырэнне інструментарыя

Пашырэнне сродкаў развіцця беларускай мовы і яе даступнасці праз падтрыманне выдання слоўнікаў, праграмаў перакладаў, дзейнасць лексічных, тэрміналагічных і мовазнаўчых камісіяў.

Спрыянне інфраструктуры адукацыі

Спрыянне стварэнню беларускамоўнай інфраструктуры ў сферы адукацыі на ўсіх узроўнях навучання (беларускія школы выходнага дня, онлайн-навучанне па-беларуску, беларускія ўніверсітэцкія праграмы, падручнікі і пад.), развіццё беларускамоўных медыяў і зместу на беларускай мове, падтрыманне беларускамоўных культурніцкіх прадуктаў і дапамога ў іх прасоўванні.

Моўная палітыка Прадстаўніцтва комплексна закранае ўсе іншыя кірункі дзейнасці і спрыяе развіццю беларускай мовы як неад’емнай культурнай спадчыны беларускага народу, яе выкарыстанню на ўсіх узроўнях грамадскага і дзяржаўнага жыцця. Клопат пра беларускую мову пры гэтым не азначае выключэння з абсягу культурнай спадчыны іншых культурных прадуктаў, напісаных па-польску, расійску, ідыш, арабску, літоўску ці ўкраінску, але залучае іх у поле недыскрымінацыі пры захаванні прыярытэтнага статусу беларускай мовы для беларускай дзяржавы і грамадства.